خبرگزاری راسک: سراج‌الدین مهرالدین، وزیر خارجه‌ی تاجیکستان به‌تازگی گفته‌است که قنسولگری افغانستان در خاروغ تحت مدیریت گروه طالبان قرار ندارد.
آقای مهرالدین روز شنبه، ۲۸دلو/ بهمن، این سخنان را در نشست سالانه‌ی این وزارت بیان کرده و آن را با رسانه‌ها شریک ساخته‌است.
در همین‌حال، او گفته‌است، از سال ۲۰۲۰، اداره‌ی وی دیپلماتان جدید و کارمندان سرقنسولگری جدید افغانستان را تایید نکرده‌است و همه کسانی که اکنون آن‌جا هستند پیش از به‌دست گرفتن قدرت از سوی گروه طالبان آمده‌اند.
این درحالی‌ست که بیش از دوسال از عمر گروه طالبان در افغانستان می‌گذرد و در این مدت هیچ‌کشوری در جهان حاضر نشده تا این گروه را به رسمیت بشناسد.
گفتنی‌ست، با آن‌که تاجیکستان تاکنون گروه طالبان را به رسمیت نشناخته‌است، اما کمک‌های بشردوستانه‌ی این کشور هم‌چنان به افغانستان ادامه دارد.
