خبرگزاری راسک: براساس گزارش رسانه‌ها، شهباز شریف، نخست‌وزیر پاکستان در دیدارش با امام‌علی رحمان رییس‌جمهور تاجیکستان در دوشنبه گفت که این دو کشور از جمله قربانیان تروریسم هستند.
نخست‌وزیر پاکستان بیان کرد که کشورش سال‌هاست با بلای تروریسم روبه‌رو بوده‌است، بهای سنگین آن‌را پرداخته و در قسمت مبارزه با این پدیده همکاری می‌کند.
او هم‌چنان، در این دیدار گسترش تجارت دوجانبه میان دو کشور را مهم خوانده و افزود که حجم کنونی منعکس‌کننده «سطح کنونی روابط برادرانه» میان اسلام‌آباد و دوشنبه نیست.
روزنامه‌ی دان روز سه‌شنبه، ۱۲ سرطان/تیر، گزارشی از سفر دو روزه شریف به تاجیکستان منتشر کرده که آنان چندین تفاهم‌نامه را امضا کرده و این موضوع برای پیش‌برد روابط دوجانبه‌شان بسیار مفید می‌باشد.
شریف در یک نشست خبری با همتای تاجیکستانی‌اش اظهار داشت: «این توافق‌ها در پیش‌برد روابط برادرانه‌ی ما و البته گسترش دامنه‌ی همکاری‌های ما در روزهای آینده کمک زیادی خواهد کرد.»
او هم‌چنان با اطمینان به رحمن گفته که برای تقویت روابط نه‌تنها در زمینه‌های کشاورزی، آموزشی، بهداشتی و ارتقای سرمایه‌گذاری؛ بل‌که در گسترش تجارت دوجانبه با او همکاری نزدیک خواهد داشت.
شریف در ادامه از رییس‌جمهور تاجیکستان دعوت کرد تا به اسلام‌آباد سفر نماید و با حال، امام‌علی رحمان نیز بر روابط صمیمانه پاکستان و تاجیکستان تاکید کرده‌است.
باید گفت که تاجیکستان و پاکستان از جمله همسایه‌های مهم افغانستان هستند که رییس‌جمهور تاجیکستان بارها از گروه طالبان در افغانستان خواسته تا حکومت همه‌شمول تشکیل دهند.
هم‌چنان او نسبت به نقض حقوق شهروندان غیرپشتون به ویژه اقوام تاجیک نیز توسط گروه طالبان صحبت‌های را مطرح کرده‌است.
