خبرگزاری راسک: امام‌علی رحمان رییس جمهور تاجیکستان در نشست سران کشورهای آسیای مرکزی گفته که تهدیدات تروریستی در مرز‌های افغانستان افزایش پیدا کرده‌است.
رییس جمهور تاجیکستان در نشست مشورتی سران کشورهای آسیای مرکز در شهر «دوشنبه» از افزایش تهدیدات تروریستی که از خاک افغانستان سرچشمه می‌گیرد، ابراز نگرانی کرده‌است.
وی از افزایش چندین برابر تولید مواد مخدر و تردد از مرز تاجیکستان خبر داده‌است.
امام‌علی رحمان تصریح کرده که به دنبال تحولات اخیر در افغانستان، تولید مواد مخدر و ترانزیت آن از مرز تاجیکستان افزایش قابل ملاحظه‌ای داشته‌است.
وی اضافه کرده که در سال ۲۰۲۲ میلادی نزدیک به پنج تن مواد مخدر کشف و ضبط شده که ۲۲ درصد افزایش را نسبت به سال ۲۰۲۱ میلادی نشان می‌دهد.
رییس جمهور تاجیکستان هم‌چنین گفته بحران انسانی در افغانستان رو به وخامت است و در این راستا ما آمادگی داریم تا از امکانات این کشور برای ارسال کمک‌های بشردوستانه به افغانستانی‌ها استفاده شود.
وی هم‌چنین با توجه به هم‌کاری‌های کشورهای آسیای مرکزی افزوده برای اجرای طرح‌های خلاقانه‌ی مشترک عامل امنیتی مهم‌ترین شرط است.
گفتنی‌ست که رییس جمهور تاجیکستان اواخر ماه مرداد/اسد، سال جاری طی یک بازدید از منطقه‌ی مرزی این کشور با افغانستان، تعداد پاسگاه‌های مرزی‌اش را افزایش داد.
براساس اطلاعات منابع تاجیک، در حال حاضر تاجیکستان در مرز با افغانستان دارای بیش از ۱۰۰ پاس‌گاه مرزی است.
این در حالی است که علاوه بر تاجیکستان شماری دیگر از کشورهای منطقه نیز از موجودیت تهدیدات تروریستی از افغانستان تحت تسلط گروه طالبان ابراز نگرانی کرده‌اند.
