خبرگزاری راسک: در ادامه‌ی نگرانی‌ها در مورد تهدیدات امنیتی از خاک افغانستان برای کشورهای هم‌سایه و منطقه، تاجیکستان بار‌دیگر بر تامین بیش‌تر امنیت مرزهایش با افغانستان تاکید کرده و از ایجاد ۷۵ پاس‌گاه در جریان یک سال گذشته در مرز با افغانستان تحت تسلط طالبان خبر داده‌است.
امام‌علی رحمان رییس‌جمهور تاجیکستان این موضوع را اخیرا طی یک نشست بیان کرده و افزوده: «در یک سال گذشته ۷۵ دیدبان‌گاه‌های سرحدی به درجه عالی در سرحد تاجیکستان و افغانستان به منظور تامین امنیت بیش‌تر این کشور ایجاد شده‌اند.»
گفتنی‌ست که ریاست جمهوری تاجیکستان اواخر ماه اسد/مرداد، سال جاری نیز در اطلاعیه‌ای اعلام کرده بود، پاس‌گاه‌هایی با تجهیزات مدرن در منطقه‌ی «بدخشان»، «مرغاب»، «اشکاشم»، «روشان»، «فرخور»، «شمس‌الدین شاهین» و پنج منطقه‌ی «ختلان» ساخته شده و به‌بهرداری رسیده‌اند.
امام‌علی رحمان رییس‌جمهور تاجیکستان نیز طی یک سفر به منطقه‌ی خودمختار «گورنو» در بدخشان در نزدیکی افغانستان، با تاکید بیان کرده بود که مرزبانان به عنوان سپری قابل اعتماد، باید مرزهای تاجیکستان را در برابر همه تهدیدات و خطرات جدید به ویژه قاچاق مواد مخدر و جنایات فراملی حفظ نمایند.
این در حالی‌ست که قبل از این، علاوه بر تاجیکستان شماری از کشورهای دیگر هم‌سایه و منطقه نیز بارها از حضور گروه‌های تروریستی در افغانستان تحت تسلط گروه طالبان، ابراز نگرانی کرده بودند با این حال، اما گروه طالبان هم‌واره ادعا کرده‌اند که اجازه نمی‌دهند از خاک افغانستان علیه کشورهای هم‌سایه و جهان استفاده شود.
لازم به ذکر است که هم‌زمان با این نگرانی تاجیکستان پیش از این، رییس ستاد مشترک سازمان پیمان امنیت جمعی مدعی شده بود که شمال افغانستان یک تهدید جدی برای کشورهای عضو این سازمان محسوب می‌شود و اعضای ستاد مشترک پیمان امنیت جمعی در حال رای‌زنی برای مهار تهدید هراس‌افگنی از خاک افغانستان هستند.
