خبرگزاری راسک: قاری احمدالله بدر، فرماندهی امنیه‌ی گروه طالبان در استان پنج‌شیر، ۱۳ کارمندش را به‌دلیل ترک نماز صبح وادار به ادای ۱۰۰ رکعت نماز نفل کرده‌است.
منابع در پنج‌شیر روز سه‌شنبه، ۸حوت/ اسفند، به رسانه‌ها گفته‌اند که قاری احمدالله هفته‌ی گذشته کارمندانش را وادار به ادای نماز نفل کرده که این افراد از ساعت ۸:۰۰ صبح تا ساعت ۱۲:۰۰ چاشت نماز خواندند.
در همین‌حال، منابع می‌گویند که قاری احمدالله به همه کارمندان فرماندهی امنیه‌ی پنج‌شیر دستور داده‌است تا در صورت ترک یک وقت نماز، ۱۰۰ رکعت نماز نفل ادا کنند.
این درحالی‌ست که گروه طالبان در دوسال حاکمیت‌شان در افغانستان، محدودیت‌های بی‌شماری را بالای شهروندان کشور وضع کرده‌اند.
گفتنی‌ست، محدودیت‌های وضع‌شده بالای شهروندان افغانستان، باعث شده تا رقم بالایی از شهروندان این کشور افغانستان را ترک کرده و به کشورهای همسایه مهاجر شوند.
