خبرگزاری راسک: خانه‌ی کمال‌الدین نظامی، استان‌دار پیشین استان پنج‌شیر در بازارک این استان دچار آتش‌سوزی شده‌است.
منابع به رسانه‌ها گفته‌اند که آتش‌سوزی در این خانه از شام روز دوشنبه، ۱۴حوت/ اسفند، به این‌سو آغاز شده و تاکنون جریان دارد.
در همین‌حال، با آن‌که دلیل این آتش‌سوزی معلوم نیست، اما منابع می‌گویند که گروه طالبان از این خانه به عنوان سنگر نظامی استفاده می‌کردند.
این درحالی‌ست که پیش از این نیز، خانه‌های فضل‌احمد معنوی، وزیر عدلیه‌ی حکومت پیشین و ظاهر اغبر، سفیر افغانستان در تاجیکستان و دست‌کم چهار باب مکتب و ساختمان ریاست معارف در پنج‌شیر دچار آتش‌سوزی شده بودند.
گفتنی‌ست، شماری از شهروندان کشور افراد وابسته به گروه طالبان را محکوم به انتقام‌گیری از کارمندان حکومت پیشین می‌کنند؛ چیزی‌که همواره از سوی این گروه رد شده‌است.
