خبرگزاری راسک: منابع محلی از استان بدخشان خبر می‌دهند که تیراندازی مرزبانان تاجیکستان، جان دو باشنده‌ی شهرستان یاوان این استان را گرفته‌است.
منابع روز دوشنبه، ۲۱ جوزا/خرداد، به رسانه‌ها گفته‌اند که این افراد بنام‌های حسیب‌الله و خلیل روز‌گذشته در روستای شولیر شهرستان یاوان در مرز میان افغانستان و تاجیکستان هدف قرار گرفته‌اند.
به گفته‌ی منابع، هنگامی بر این دو تن تیراندازی شده که در میان یک گروه ۱۵ تنی که هویت‌شان تاکنون روشن نشده، قصد داشتند، به خاک تاجیکستان وارد شوند.
بر‌بنیاد روایت منابع، پس از آن‌که جنگ‌جویان مرزی تاجیکستان تیراندازی کرده‌اند، این گروه از ساحه به سمت نقطه‌ی مرزی فرار نموده‌اند.
مقام‌های تاجیکستانی و گروه طالبان تاهنوز در رابطه به این موضوع به صورت رسمی چیزی نگفته‌اند.
براساس گزارش‌ها، پس از آن‌که گروه طالبان برکشور مسلط شدند، نزدیک به ۳۰۰ خانواده‌ی اعضای حرکت اسلامی اوزبیکستان و انصارالله تاجیکستان در شمال‌شرق، به‌ویژه در بدخشان به سر می‌برند.
هم‌چنان، لازم به ذکر است که کشورهای مختلف به ویژه تاجیکستان همواره موجودیت گروه‌های تروریستی در خاک افغانستان زیر سلطه‌ی گروه طالبان را امر نگران‌کننده خوانده‌اند.
در یک مورد چندی پیش رییس پارلمان تاجیکستان ابراز کرد که افغانستان زیر سلطه‌ی گروه طالبان بار دیگر به مرکز تروریزم تبدیل شده‌است.
