خبرگزاری راسک: رهبران چین و تاجیکستان با صدور اعلامیه‌ی مشترک بر تشکیل دولت فراگیر در افغانستان تاکید کردند.
در اعلامیه‌ی مشترک شی جین پینگ و امام‌علی رحمان آمده است‌که آن‌ها از دولتی با حضور نمایندگان تمامی گروه‌های قومی، مذهبی و سیاسی در افغانستان حمایت می‌کنند.
هم‌چنین، در این اعلامیه‌ی مشترکِ رهبران چین و تاجیکستان آمده است‌که افغانستان مستقل، بی‌طرف و متحد در راستای منافع منطقه است.
این در حالی است‌که شی جین‌پینگ، رییس جمهور چین در ادامه‌ی نشست سازمان هم‌کاری‌های شانگهای به دوشنبه، پایتخت تاجیکستان سفر کرده و با امام‌علی رحمان، رییس جمهور تاجیکستان دیدار کرد. این دو ره‌بر در بیانیه‌ی مشترکی که صادر کردند گفتند که خواستار افغانستان صلح‌آمیز و عاری از تروریسم، جنگ و مواد مخدر استند که بتواند در صلح و هماهنگی با کشورهای هم‌سایه به سر ببرد.
گفتنی است‌که پیش از این نیز رهبران سازمان هم‌کاری شانگهای روز پنجشنبه در نشستی در آستانه اعلام کردند که تشکیل دولت فراگیر، تنها راه افغانستان برای رسیدن به صلح است.
این رهبران تاکید کردند که تنها راه رسیدن به صلح پایدار در افغانستان تشکیل دولتی فراگیر با حضور نمایندگان همه گروهای قومی و سیاسی در این کشور است.
از طرف دیگر، هم برخی از رسانه‌های دولتی روسیه در پی نشست رهبران سازمان هم‌کاری شانگهای گزارش دادند که رهبران این کشورها از طرح ایجاد «کمربند امنیتی» در اطراف افغانستان حمایت کرده‌اند. این رسانه‌ها نوشتند که طرح کمربند امنیتی از سوی رییس جمهور تاجیکستان مطرح شده است.
پیش از این، روسیه و ایران نیز از طالبان خواستند دولت فراگیر تشکیل بدهند. اما طالبان همیشه می‌گویند که دولت ما فراگیر است و این نیز یک مسئله‌ی داخلی و مربوط به ماست.
