خبرگزاری راسک: چین در اعلامیه‌ی کُشته و زخمی‌شدن شهروندانش در نزدیک مرز افغانستان و تاجیکستان را محکوم کرد.
در دوشنبه‌‌ی گذشته در یک حمله در استان ختلان تاجکستان یک شهروند این کشور کشته شد و چندتن دیگر زخم برداشتند.
وزارت خارجه‌ی چین با انتشار بیانیه‌ای در واکنش به کشته و زخمی‌شدن اتباع این کشور در مرز تاجیکستان-افغانستان ضمن محکوم کردن این حمله، نسبت به وضعیت امنیتی در مرزهای این دو کشور ابراز نگرانی کرد.
این کشور گفته است‌که مرزهای افغانستان و تاجیکستان امن نیست، بلکه تهدید کننده است.
وزارت خارجه‌ی چین هم‌چنین اعلام کرد که یک گروه از سوی سفارت این کشور در دوشنبه پایتخت تاجیکستان اعزام شده تا «با مجروحان ابراز هم‌دردی کرده و هماهنگی‌های لازم برای رسیدگی به امور بعدی را انجام دهد.»
این کشور تاکید کرده که افغانستان کشورهای هم‌سایه و منطقه را تهدید می‌کند.
کشور چین در حالی چنین اظهار کرده که روز دوشنبه، ۲۸ عقرب در یک حمله در دره‌ی «زربوز» در استان ختلان تاجیکستان یک چینی کُشته شد و چهار تن دیگر زخمی شدند. بر اساس گزارش‌ها، افراد مسلح به یک شرکت خصوصی چینی حمله کردند.
ظاهرا کسی مسوولیت این حمله را به عهده نگرفته است. اما پیش از این دولت تاجیکستان گفت تروریست‌ها از افغانستان این کشور را تهدید می‌کنند.
گفتنی است‌که پس از تسلط گروه طالبان به افغانستان شماری زیادی از کشورهای منطقه و به ویژه هم‌سایه‌های افغانستان ترس خود را از تهدید از این کشور ابراز کردند. این کشورها افغانستان را لانه‌ی تروریست می‌دانند و می‌گویند گروهای مختلف تروریستی از جمله داعش، القاعده و تی تی پی در افغانستان بسر می‌برند و موجودیت شان تهدید برای جهان است.
