خبرگزاری راسک: منابع محلی از پروان می‌گویند که طالبان برخی افراد تاجیک‌تبار را از ادارات حکومتی برکنار کرده و در عوض شان افراد خود یا جوانان پشتون‌تبار را مقرر کرده‌اند.
به گفته‌ای منابع، گروه طالبان روند تصفیه‌ی قومی را در اداره‌های دولتی استان پروان شدت بخشیده و کارمندان تاجیک و فارسی‌زبان را به بهانه‌های مختلف از کار برکنار می‌کنند.
منابع هم‌چنان ادعا می‌کنند که گروه طالبان کارمندان باقی‌مانده از حکومت پیشین را اخراج، تنزیل رتبه و زندانی کرده و به جای آنان افراد وابسته به خود را که اکثراً پشتون‌تبار هستند، گماشته‌اند.
دو تن از کارمندان تاجیک‌تبار که به‌تازگی از زندان گروه طالبان آزاد شده‌اند، تایید کرده‌اند که این گروه با پرونده‌سازی آنان را زندانی کرده و پس از آزادی، بدون هیچ توضیحی اخراج شده‌اند.
شماری از کارمندان تاجیک‌تبار ادارات دولتی پروان گفته‌اند که گروه طالبان برخی از کارمندان تاجیک را به استان‌های دوردستی چون هلمند، پکتیا، پکتیکا و نورستان منتقل کرده‌اند، اقدامی که بسیاری آن را اخراج غیرمستقیم می‌دانند، زیرا کار در این مناطق برای آنان دشوار است.
پیش از این نیز طالبان متهم شدند که جوانان تاجیک را به بهانه‌های مختلف از کار و ادارات اخراج و در عوض شان افراد خود را مقرر می‌کنند. این شکایت از طالبان بیش‌تر در استان‌های عمدتا تاجیک‌نشین از جمله تخار، پروان و کاپیسا گزارش می‌شود.
این در حالی است‌که گروه طالبان چندی پیش تمامی کارمندان تاجیک‌تبار فابریکه‌ی نساجی بغلان را اخراج و افراد وابسته به خود را جایگزین کردند. بارها از کابل، پنج‌شیر و کاپیسا نیز گزارش‌های مشابهی منتشر شده است.
